منقول من بنت بتتعاكس, رسالة الى كل الشباب "ارحمونا بقى"

السلام عليكم ورحمة الله وبركاته

اكيد استغربتم من العنوان ده بس دى فعلا رسالتى لكل الشباب ارحمو البنات بقى من المعاكسات

اولا :اللى بيقول ان البنات بتحب تتعاكس ده مش عارف حاجة يعنى انا كبنت اكره المعاكسات بحس ان انا بتعامل كمواطن درجة تانية..
يعنى ببقى ماشية فى الشارع مش واخدة راحتى وياسلام لو فى تجمعات شباب بقى يا سلام الواحد يبقى ماشى فى نص هدومه مش عارف يعمل ايه بجد بقت فوبيا عندى وقبل ماتقولو ان انا بكبر الموضوع:
انا عشان انزل اشترى شوية طلبات للبيت لازم اتعرض لكلام وسخف واستظراف .ده غير بقى اللى بيقول يا بت يعنى حتى مش بيعاكس بادب
طب حد يقولى انا مش ليا حقوق فى البلد دى ازاى انا ابقى ماشيةمع صحابى وواحد ييجى سورى فى اللفظ -يتف على الارض -ادامنا كدة زى ما يكون بيقولنا انا بحتقركو..ويا سلام على البصات اللى تخلى البنت تحس انه بيخترقها كدة والله يعنى واحد يقف يتفرج عالبنت من فوق لتحت كدة بكل بجاحة

ده غير بقى الالفاظ البذيئة والشتايم-لا مجال لذكر بعض الامثلة-
وتخيل كدة لو انت ماشى بعد كدة بنت جت قالتلك "الحلاوة حلاوة الروح "هتعمل فيها ايه بذمتك؟

يا شباب بجد ارحمونااااااا بقى عشان مفيش حد فيكو ممكن يتخيل انه يتعرض للخوف والمضايقات دى بجد
وبعدين اللى بيقول احنا مش بنعاكس البنات المحترمة يبقى بيتحجج ده والله حتى المنقبات بيتعاكسو وبعدين هو انت لو عاكست بنت لابسة خليع هتروح تلبس الحجاب يعنى جرى؟وبعدين هو يعرف منين البنت محترمة ولا لا

يا جماعة اى واحد فاكر ان دى رجولة يبقى غلطان اوى اوى الرجولة ان انت تحافظ على اى بنت زى اختك يعنى لما تلاقى حد بيكلمها انت اللى تداافع عنها-شباب اليومين دول عادى بنت تتهزا ولا تتضرب قدامه من واحد غريب ميتحركش من مكانه-ياريت اسمع ارائكو واكيد انا عندى حق مش كدة؟؟
وعايزة اعرف راى البنات اللى اكيد بيعانو زيى
__________________